طردت اخت حبيبي

هل أنا غلطانة إني طلعت أخت حبيبي من البيت بسبب التلميحات اللي قالتها عن شغلي
أنا عندي 30 سنة وبشتغل في شركة في مجال تكنولوجيا المعلومات في قسم المبيعات التقنية.
شغلي نظامه هايبرد يعني فيه أيام بشتغل فيها من البيت وفيه أيام لازم أروح المكتب أو مواقع العملاء.
كل يوم بلبس ستايل سمارت كاجوال وبحب اللبس اللي ألوانه جريئة وأنثوية وبحط ميكاب.
ولما بشتغل من البيت عندي وبيبقى في مكالمات فيديو كتير فببقى مجهزة إضاءة وكاميرا على الحامل اللي على المكتب في البيت.
أنا دخلي كويس وقدرت أشتري بيت ب أوض قبل ما أتعرف على خطيبي اللي عنده 28 سنة.
هو نقل معايا هنا السنة اللي فاتت لما اتخطبنا وعلاقتنا جميلة ومستقرة.
من شهر تقريبا أخته اللي عندها 35 سنة جت تقعد معانا شوية.
هي كانت بتمر بمشاكل مع جوزها وعايزة تبعد شوية عنه لغاية ما يشوفوا هيعملوا إيه.
عندنا أوضة ضيوف لطيفة ومكنش عندي أي مانع إنها تقعد معانا.
هي كانت بتسألني كتير عن شغلي وكنت بشرح لها بالتفصيل.
أنا افتكرت إنها يمكن بتفكر تشتغل بما إن احتمال يحصل طلاق وهي طول عمرها ست بيت ومشتغلتش قبل كده.
لكن اكتشفت وهقولكم بعدين ازاي إنها كانت بتسأل عشان تأكد لنفسها إن دخلي ولبسي وطبيعة شغلي الغير ثابتة إني أكيد واحدة شمال بتعمل حاجات غير شريفة وعلى أساسها باخد الفلوس دي!!!!
آه وهقول كمان معلومه

وهي إن أنا كل يوم وانا راجعة من الشغل بعد ما أعدي على الجيم بغير هدومي وبرجع البيت أستحمى.
أنا عندي خوف كده أو حاجة نفسية من حمامات الجيم فمش بستحمى هناك آه بحب التمرين أوي لكن عندي موسوسة شوية من نظافة الجيم فببقى هموت وأدخل أستحمى أول ما أوصل البيت.
وجوزي شاف ده شيء ظريف وبيهيزر معايا عليه.
من كام يوم كان بيهزر ووقف في طريقي قبل ما أدخل الحمام.
وأنا كنت بقول له بضحك يا عم أنا حاسة إني قرفانة وعايزة أستحمى الأول والحوار ده كان هزار ومتعودين عليه.
لكن أخته فجأة اتضايقت جدا وقعدت تعيط.
أنا افتكرت إن الكلام ضايقها أو كسفها فاعتذرت ليها.
يوم الحد حبيبي رجع البيت يضحك وقال إن اللي حصل كان سوء تفاهم رهيب.
وإن أخته راحت قالت للعيلة كلها 
هو شايف الموضوع يضحك لكن أنا كنت محرجة ومضايقة جدا لأن هي افترضت عني كلام وحش في حقي وقدمتني بشكل وحش وشوهت صورتي قدام عيلته.
فتحت معاها الموضوع وقلتلها إني استضفتها في بيتي من غير ما أطلب منها أي حاجة وهي ردت ده بإساءة وظلم.
وطلبت منها إنها تسيب البيت وفعلا مشيت.
دلوقتي خطيبي زعلان مني وبيقول إني كنت قاسية واتسرعت وطردتها.
بس أنا شايفة إنها بوظت علاقتي بعيلته كلها والموضوع مش بسيط ومش حاجة أقدر أتجاهلها.
فهل أنا فعلا الغلطانة ولا هي اللي تجاوزت حدودها بطريقة مش مقبولة
تحديث
ناس كتير في الردود على البوست اللي فات قالوا إن البيت بيتي أنا وخطيبي مينفعش يتحكم كده فحابه أوضح إن أنا اللي اشتريت البيت قبل ما أنا وحبيبي ندخل في علاقة والبيت بتاعي.
بس هو كمان دخله كويس وبيدفع إيجار نص قسط البيت وإحنا بنقسم كل المصاريف بالنص فبالتالي البيت يعتبر بيته هو كمان ومن حقه إن أخته تقعد معانا.
هو اتضايق لأني طلبت منها تمشي من غير ما أكلمه أو آخذ رأيه الأول وده صراحة شيء منطقي.
أنا بس كنت بتكلم عن موضوع ملكية البيت عشان أوضح إن ظروفي المادية كويسة وده يمكن خلا أخته تشك في مصدر فلوسي.
أنا وخطيبي اتكلمنا كتير في الموضوع ودلوقتي بقينا فاهمين بعض أكتر.
هو بيحب أخته جدا بس في نفس الوقت شايل منها بسبب حاجات كتير عملتها قبل كده.
عيلته تقليدية جدا وعندهم تمييز ضد الستات وأخته كانت أكتر واحدة اتظلمت بسبب ده وبسبب ظروف تانية.
هي في أغلب الوقت حنينة وبتتعب عشان تهتم بكل الناس
لكن لما أهلها ينتقدوها أو يضغطوا عليها أعصابها بتتعب وبتدور على حد ترمي عليه الغلط عشان تبعد التركيز عن نفسها.
وعملت كده كذا مرة مع إخواتها وللأسف الأسلوب ده بينجح معاها كل مرة.
وفي مرة خطيبي كان هيروح جامعة مهمة اتقبل فيها فهي اخترعت قصة غريبة كده وقالت لأهله إنه عضو في عصىابة بتسىرق عربيات!!!!
أهله اتخضوا وحاولوا يمنعوه يروح الجامعة عشان يفضل تحت رقابتهم وده كان واحد من أسوأ المواقف اللي عملتها وفي حاجات تانية كتير ومواقف زي دي.
وبالنسبالي ده كفيل إنه يخليني أقاطع أختي لو عملت كده معايا بس هو عنده تعاطف معاها أكتر لأنها في نفس الوقت عملت معاه مواقف حلوة كتير ووقفت جنبه في حياتهم.
أخوهم التاني جه عندنا يوم الجمعة واتعشينا واتكلمنا وشرحلي إن دي مش أول مرة تعمل حاجة زي دي وساعات إخواتها كانوا بيتعاقبوا بسببها وساعات كذبها كان بيتكشف بدري.
المرة دي خطيبي قال لازم نوضح عشان مفيش حد ياخد فكرة غلط وفتح موبايله وورى أهله صفحتي على LinkedIn وكمان فيديوهات من شركتي التقنية اللي بظهر فيها في شغل حقيقي.
وخطيبي كان شايف الموضوع يضحك لأن التهمة المرادي كان سهل إثبات إنها مش حقيقية وده عكس المرات اللي عملت فيها مشاكل قبل كده.
وهو كمان شاف إن اللي حصل كان هجوم عليه هو مش عليا بس أنا مش متفقة معاه في النقطة دي بس فاهمة ليه هو شايفها كده بما إنها عملتله مشاكل كتير.
دلوقتي هو فاهم أنا اتضايقت قد إيه واتفقنا إن أخته مش هتقعد معانا تاني أبدا.
المشكلة اتحلت بيني وبين خطيبي وأنا بحبه وأقدر فيه إنه رغم اللي حصل كان لسه بيحاول يكون رحيم ناحيتها.
بس أنا متقلقة من مستوى المشاكل اللي في عيلته.
أنا عايزة أتجوز وأخلف منه بس فكرة إن يكون في عمه عندها السلوك ده بتخوفني جدا خصوصا لو هيكون في أطفال.
ومش عارفة هتعامل مع النقطة دي إزاي لسه.
شكرا للناس اللي ردت ممتنه ليكم .