مراتي مش جذابه
هل أنا غلطان إني كنت صريح وقلت إن مراتي بقت مش جذابة بالنسبالي بعد العملية؟
مراتي عملت عملية تجميل من كام شهر. كنا اتكلمنا في الموضوع قبل كده وكنت ضد الفكرة بس في الآخر القرار كان قرارها ومكنش ليا رأي فعلي.
دلوقتي شكلها غريب. شالت الدهون من وشها وعملت فيلر في شفايفها ورفعت رقبتها وكمان شوية حاجات تانية مش فاهمها قوي.
بقت تديني إحساس مش مريح كده زي الشخصيات اللي شكلها صناعي والموضوع بيخوفني. دلوقتي هي خفت تمامًا وعاوزانا نرجع طبيعي تاني زي أي زوجين. أنا حاولت أعمل كده بس مش بنفس الحماس زي زمان. ولما بحاول بكون حريص إن النور يكون مطفي أو بسيط جدًا.
عدّا كذا شهر وبقيت تقريبًا مش طايق أبص في وشها وهي طبعًا لاحظت وبقالها فترة بتزنّ عليا عشان أقولها إيه اللي حصل وحاولت أقولها إني تعبان من الشغل أو تعبان عمومًا يعني
في الآخر انهارت وسألتني لو أنا بخونها فقلتلها لأ وطلبت تشوف موبايلي ففتحته وسلّمتهولها ومكنش عندي أي قلق لأني فعلًا مش بخونها. قعدت ساعة تفتش فيه وملقتش حاجة فسألتني ليه اتغيرت فحاولت أشرح إني مش في المود دلوقتي.
وكل اللي قلته مكنش كفاية بالنسبة ليها ففضلت تسأل وتزن وفي الآخر قلت الحقيقة. مكنش كلامي جارح ومقولتش الكلام بطريقة وحشة. بس قلتلها إن شكل وشها الجديد مش عاجبني ومش بشوفه جذاب وده مأثر عليا.
سألتني لو عشان كده بقيت بطفي النور فقلتلها أيوه. بدأت تعيط وقالت إنها محتاجة وقت لوحدها ومشت راحت تقعد عند أختها.
من وقتها وكل الناس بتشتم فيا وأختها قالت إني شخص زبالة عشان اتريقت على شكل مراتي وصحابها كلهم شايفين إني إنسان وحش.
أنا كنت بحاول ماقولش حاجة. بس مقدرش أجبر نفسي إني ألاقيها جذابة.
تحديث
مراتي رجعت البيت امبارح وأخيرًا قعدنا واتكلمنا كويس.
قالتلي إن السبب اللي خلاها تعمل العمليات دي هو إن مامتها وأختها ضغطوا عليها وأقنعوها إنها بدأت تبان كبيرة في السن وإني ممكن ألاقي حد تاني وأسيبها لو ماعملتش حاجة وعشان كده مامتها ادتها الفلوس عشان تعمل العمليات دي.
المضحك إن مامتها وأختها نفسهم شبه بروس كامبل يعني دول آخر ناس المفروض يتكلموا عن التجميل أصلاً. استخدمت شوية تعليقات كنت قريتها على البوست بتاعي كمواضيع في الكلام. قلتلها إني بحبها وإنها الإنسانة اللي عاوز أكمل حياتي معاها وقلتلها إن العمليات دي هتاخد وقت على ما تهدى شوية وإن مع الوقت هتعود على شكل وشها عادي.
سألتني لو حابب إنها تشوف دكتور عشان تشوف لو ممكن ترجع شكلها القديم. كنت هصرخ فيها. آخر حاجة في الدنيا
قعدنا بنتكلم حوالي ٣ ساعات وقررنا إن مامتها وأختها مش هيكون ليهم أي دور في قرارات حياتنا بعد كده وهي هتسيب وشها زي ما هو وتديني فرصة أتعامل معاه وهنبدأ ندور على أخصائي علاقات زوجية وممكن كمان كل واحد فينا يشوف أخصائي لوحده.
أنا هسعى إني أوريها كل يوم إني لسه شايفها جذابة وهي كمان هتحاول تصدقني لما أقولها إني بحبها زي ما هي.
قررنا كمان إننا هنكلم مامتها وأختها ونقولهم إننا واخدين بريك منهم وهنحظرهم من حياتنا شوية لحد ما نرتّب أمورنا وبعدين نبقى نشوف لو هنرجعهم ولا لأ.
شكرًا لكل الناس اللي حاولوا يساعدوني.
وحابب أضيف نقطة كده على الهامش… ماكنتش متخيل إن في رجالة كتير عندهم هوس بالست الزرقا الغريبة اللي شبه الإخطبوط.
