رفعت النقاب
رفعت النقاب علشان الرؤية الشرعية وانا عيني في الأرض ، لقيته اتصدم وقال لأ يلا بينا نمشي أنا كنت فاكرها أحلى من كده .
هو قال الكلمتين دول وانا مستوعبتش هو بيقول ايه !
وحرفيا جتلي عقدة إني أطلع اقابل عريس وأرفع النقاب ، من ساعتها وقولت أنا مش هتجوز خالص وهعيش كده ..
في يوم من الأيام كنت راحه أشتري قماش علشان الخياطه تعملي فستان علشان فرح أخويا .
حاسبت ومشيت وروحت على الخياطه بسرعه لقيتها بتقولي القماش زيادة ٤ متر .
قولتلها ايه دا ازاي
قالتلي لو كده اشتريه منك خامة القماش جميله أوي وطالعه من عيني
قولتلها من غير تردد لأ الله يباركلك قصيلي الأربعه متر وهاتيهم أرجعهم للراجل
هترجعي المشوار دا كله ، دا في آخر بلاد المسلمين يا بنتي
هرجع طبعا ودلوقتي ، ربنا يعيني على المسافة بقا .
رجعت للراجل وكانت المسافة
الراجل كتر خيره جابلي مايه وقالي في حاجه
القماش دا طلع زياده عن اللي حاسبتك عليه
طب ماجبتيهوش بكره ليه شكلك جايه من مشوار
لأ مينفعش ، ايه ضمني بكره فيه ايه وانت ليك حق عندي ، اتفضل يا حاج ، سلام عليكم .
يا بنتي يا بنتي
نعم
انتي مخطوبه ؟
اتوترت وقولتله : لأ
طب انا عاوزك لابني ، دا دكتور كبير ومربيه كويس وتعبان عليه .
أول ما قالي كده اتوترت وقولتله: ربنا يباركلك فيه بس أنا مش عاوزه اتجوز
ليه يا بنتي ؟ باين من صوتك انك صغيره وهو مالهوش نصيب في الخطوبات ، وأنا مش هلاقي واحده زيك .
ياحاج احنا دلوقتي كل عريس بيختار عروسته بنفسه .
طب سيبيني أجيلكم البيت أنا وهو
ماشي يا حاج دا رقم والدي
تاني يوم على طول لقيتهم جايين، وأنا استغربت مكنتش متوقعه إن الحوار بالسرعة دي ،
المهم لبست وطلعت وقعدت معاه واتكلمنا كتير أوي ، كلامه مريح ، وباين عليه متربي فعلا ، بس كل دا مطلبش إني أرفع النقاب ، بعد ما اتكلمنا وخلاص هيقوم قولتله : استنى من فضلك
خير يا عروسة
مش هتشوفني ؟
وأشوفك ليه
يمكن أطلع وحشه
انتي زي القمر
انت عرفت منين إني زي القمر
النبي صلى الله عليه وسلم قال واظفر بذات الدين تربت يداك ، وهلاقي اجمل من كده فين
اتكسفت وقولتله : طب ممكن طيب أرفع النقاب تشوفني
لأ مش ممكن ، ربنا ييسر لنا كده على خير وهشوفك براحتي .
مشي وأنا مش مستوعبه الجمال دا كله والأخلاق لكن بردو ايدي على قلبي ، اتخطبنا ٣ شهور ، كان محترم ومتربي وكل مره جايبلي شوكولاته في جيبه وهو جاي ويقولي ماعيش أجبلك علبه ؟
اضحك
مره قالي مش هتسأليني بقبض كام زي كل عروسه اتقدمتلها؟
قولتله : قال رسول الله ﷺ:
«إذا جَاءَكُم من ترضَون دِينهُ وخُلُقه فزوِّجوه، إلا تفعلُوا تكن فتنةٌ فِي الأرض وفسادٌ عريض».
هحتاج أحسن من كده ايه أسأل عنه
المهم جه يوم الفرح وأنا متوتره وحاطه ايدي على قلبي ، لبست الفستان الأبيض وحطيت ميكب خفيف كده علشان مش حابه أخفي ملامحي تحت النقاب الأبيض بتاعي وعملنا فرح إسلامي جميل وكتبنا الكتاب في القاعه وروحنا بيتنا ، أول ما دخلت باب البيت قالي نورتي بيتك يا عروسة .
قومت رافعه النقاب وعيوني مرغره بالدموع وأنا خايفه من الموقف دا ، لكن الصدمه لقيته بيقولي
اللهم صل على كامل النور ، ما شاء الله عليكي ، ولقيته باصص لفوق ويقول كتير عليا يارب الحمد لله .
من يومها وأنا شايفه
#منقول
